આતાની સાથમાં – સ્નેહભર્યા સંગાથમાં

આતાની સાથમાં – સ્નેહભર્યા સંગાથમાં

.
“આતાવાણી”ના બ્લોગર મિત્રો અને તેમના વાચક વર્ગ માટે એક નાના સમાચાર.

.

ઋષિ જીવન જીવતાં આ સંસારી જિવડા સાથે મને ન્યુ જર્સીમાં થોડાક કલાક ગાળવાનો અમૂલ્ય લાભ મળ્યો. ટેનેસીથી એમના પૌત્ર ડેવિડના પરિવાર સાથે આતા ૩૦ ઓક્ટોબર શુક્રવારે ન્યુ જર્સી આવ્યા. માર્ગમાં મારે ત્યાં થોભવાના હતા. કાર તકલીફ ને કારણે એ શક્ય ન બન્યું. એઓ સીધા એમના પૂત્ર દેવ જોષીને ત્યાં જ પહોંચી ગયા.

.
શનિવારે એમના સુપુત્ર દેવ જોષીને ત્યાંથી એમને લઈને હું રેડિયો દિલના “છેલ છબિલો ગુજરાતી” કાર્યકર્મમાં કૌશિક અમીન સાથે વાર્તાલાપ માટે ગયા. એમના જીવનની રસપ્રદ વાતો લગભગ દોઢ કલાક ચાલી. એમનું બાળપણ, આર્મી અને પોલીસ તરીકેના અનુભવો. એરિઝોનાનો વસવાટ અને જીવન, કનક રાવળ અને સુરેશ જાનીની મૈત્રી, બ્લોગ, સાહિત્ય અને શાયરીઓ. જીવન સ્પેક્ટ્રમના રંગો દંભ વગરની વાણીમાં રેડિયો શ્રોતાજનો માટે વહેતા કર્યા.

.

એમની સાથે કારમાં પણ અંગત જીવન અને વિચારોની મુક્ત મને લ્હાણી કરી. (બધું ના લખાય. પ્રાઈવસી એક્ટ લાગુ પડે)

.
ગઈ કાલે રવિવારે ત્રણથી પાંચ દેવ જોષીના “ભારત દર્શન” રેડિયો પ્રોગ્રામમાં પણ એમણે શેર શાયરીની રંગત જમાવી.

.
સાંજે “ગુજરાત દર્પણ” કાર્યાલયમાં સ્થાનિક મિત્રો સાથે આતા-વાચાનો જલસો થઈ ગયો. તંત્રીશ્રી સુભાષભાઈ શાહ અને એમના ધર્મપત્ની ભગવતીબહેનની યજમાનગીરી હેઠળ, આતા, જાણીતા પત્રકાર અને ‘ગુજરાત ફાઉન્ડેશન ઇન્ક’ના ચેરમેન કૌશિક અમીન, દેવ જોષી, ગુજરાત ટાઈમ્સના ભૂતપૂર્વ તંત્રી રમેશભાઈ જાદવ અને એમના પત્ની, સિનિયર સેવાના લોકપ્રિય આગેવાન જોસેફ પરમાર, “Jagadish Christian.Com મારું જીવન…મારાં સ્વજન…મારો સમાજ…મારું જગત…૨૦૦૪ થી આ જાળું ગૂંથી રહ્યો છું”ના બ્લોગર જગદિશ ક્રિશ્ચિયન, સાહિત્ય અવલોકનકાર મિત્ર અમૃત હજારીએ આતાનો સંગરંગ માણ્યો હતો.

.
કોઈ પણ વિષય એવો ન હોય કે જેને માટે એમની પાસે શેર શાયરી ન હોય. એમની તંદુરસ્તી અને એમની અદભૂત સ્મરણ શક્તિને દાદ આપવી ઘટે. વાત વાતમાં જે વયસ્ક વડીલો ઘડપણના ગીતો ગાતા હોય એમણે આતા પાસે ઘણાં પાઠો શીખવાના છે. એમના અસ્ખલિત વાણીપ્રવાહમાં અઢી-ત્રણ કલાક અમો સૌ વહેતા રહ્યા. (સમય મર્યાદાવાળા ફંકશનમાં એમને માઈક આપવાનો ચાળો કોઈએ કરવો નહીં )
આતા અને બીલક્લિન્ટન વચ્ચે થોડીક સામ્યતા છે.
બન્નેને વીગન છે. આતા દૂધ કે દૂધની બનાવટો, દહીં, છાસ, માખણ, ધી ખાતાં નથી. મીઠું, મરચા, મસાલાવાળું પણ ખાતા નથી. (શું ખાય તે તો જો તમે જમવા બોલાવો તો એમને જ પૂછી લેજો) ફાર્મસિસ્ટ ભૂખ્યા ન રહે એ ભાવનાથી હું રોજના ૧૪-૧૫ ગોળા ગળું છું (મારો ગ્રાન્ડસન ફાર્મસિસ્ટ છે) આતા એક પણ ગોળી ગળતા નથી.
બીજી સામ્યતા એ છે કે બન્ને સુંદર મહિલાઓના વ્હાલા યંગ મેન છે.
અત્યારે તો આટલું જ.