ચંદુ ચાવાલા અને કરસનદાદાનું “Me Too”

પ્રવીણ શાસ્ત્રી

પ્રવીણ શાસ્ત્રી

ચંદુ ચાવાલા અને કરસનદાદાનું “Me Too”

આજે અમારા કરસનદાદા ચોધાર આંસુએ રડ્યા. ડૂસકાં સાથે એમણે અનેકવાર રમાની માફી માંગી.

ખરેખર તો વાત આનંદની ઉજવણીનો હતો. ચંદુભાઈને ત્યાં આજે અમારી સુરતી ગેન્ગની દિવાળી ડિનરનો પ્રોગ્રામ હતો. બપોરે બે વાગ્યાથી જ ખાણીપીણીની ધમાલ ચાલતી હતી. મહિલાવર્ગનો તો હજુ નવરાત્રીનો નશો ઉતર્યો ન હતો. ગરબા અને રાસ પણ રમાયા. એક રૂમમાં ત્રણ ચાર કલાત્મક રંગોળી પુરાઈ હતી. મોટા ધડાકાવાળા બોમ્બ તો નહીં પણ સ્પાર્કલ્સનો તો ખજાનો હતો. આખો દિવસ ખૂબ ધમાલ રહી. રાત્રે દશ વાગ્યા પછી બાળબચ્ચા વાળા ઘરબેગા થયા. થોડા અંગત મિત્રો અને ચંદુનું ફેમિલી થાકીને વાતોના ગપાટા મારવા બેઠું હતું.

વાત નીકળી “મી ટૂ”  મુવમેન્ટની. એક ખૂણા પરની રિક્લાનર પર પગ લાંબા કરીને અમારા સદાના છન્નુવર્ષના કરસનદાદા કેરેટ કેઇક ઝાપટીને બેઠા હતા.

‘આ “મી ટૂ” કઈ બલા છે.’ કરસનદાદાએ પુછ્યું.

‘દાદા એ બહુ મોટી બલા છે. અમેરિકા પુરતી નથી આખી દુનિયામાં આ બલાની વાત છે. સૌથી વધારે વાતતો દાદા તમારા ઈન્ડિયામાં થાય છે.’  મંગુ મોટેલ દાદાને સતાવવાની એક પણ તક છોડતો નહિ.

‘મંગા ઈંન્ડિયા એકલું મારું નથી. તારો બાપ અને તેનો બાપ પણ પણ ઈન્ડિયામાં જન્મેલો છે. તું અમેરિકામાં પેદા નથી થયો.’

અમારી સાથે મહિલા વર્ગ પણ હતો.

‘આમ તો મેં પણ “મી ટૂ” ની વાત સાંભળી  છે પણ કાંઈ સમજાતું નથી’ ચંપાએ પણ જાણવાની ઈચ્છા દર્શાવી.

‘મમ્મી “મી ટૂ” એ મહિલા જાગૃતિની શરૂઆત છે.’ ચંદુની સૌથી નાની વહુ વિદુષીની એ ચંપા સાસુને શિક્ષિત કરવા માંડી. વિદુષીની ઘરમાં સૌથી વધુ ઠરેલ અને એજ્યુકેટેડ વહુ. એ જ્યારે બોલતી કે વાત કરતી હોય ત્યારે સૌ એને ધ્યાન આપીને સાંભળે. એણે જે જાણતી હતું તે કહેવા માંડ્યું.

‘૨૦૦૬માં એક નાની બાળકી પર કામુક હુમલો થયેલો. તે સમયે તરાના બર્કે નામની એક સોસિયલ એકટિવિસ્ટના મોંમાંથી અચાનક જ શબ્દો નીકળ્યા “Me Too”. આ “મી ટૂ”. કદાચ પોતાના ભૂતકાળની વાત હશે. ત્યાર પછી મીરામેક્સ નામની મોટી કંપનીના માલિક અને ફિલ્મપ્રોડ્યુસર હાર્વે વેઇનસ્ટીને એલીસા મિલાનો નામની અમેરિકન અભિનેત્રી અને ગાયિકાને જાતીય સતામણી કરી. બસ એલિસા મિલાનોએ આ વાત સોસિયલ મિડિયા પર વહેતી કરી અને એણે પણ તરાના બર્કેના જ શબ્દો “મી ટૂ” શબ્દો વાપર્યા. સીધો સાદો અર્થ તો “મને પણ” એવો થાય. હું પણ પિડિત છું. મને પણ અન્યાય થયો છે. આ શબ્દ નારી જગતનો ચેતના બની ગયો. જાતીય સતામણીનો ભોગ બનેલી મહિલાએ મોં સંતાડવાની જરૂર નથી. એ સંદેશની વાત છે. બહાર આવો અને સામનો કરો. તમે ગુનેગાર નથી પણ તમે પીડીત છો. સમય બદલાયો છે. તમારી વેદના માત્ર એક ક્ષણમાં તમારી વાત આખા વિશ્વમાં ફેલાવી શકો છે.’

‘અને મિલાનોએ એ જ કર્યું. ૧૫ મે, ૨૦૧૭ ના રોજ બપોરે મિલાનો દ્વારા “મી ટૂ” શબ્દને ટ્વિટ કરાયો અને દિવસના અંતે તો બે લાખથી વધુ લોકોમાં પ્રસરી ગયો. પછી ૧૬ ઓક્ટોબર સુધીમાં પાંચ લાખથી વધુ વખત ટ્વીટ થયો. ફેસબુક પર પહેલા ૨૪ કલાક દરમિયાન ૧૨ મિલિયન પોસ્ટમાં,મી ટૂ હેશટેગનો ઉપયોગ પાંચ મિલિયનથી વધુ લોકોએ કર્યો. આ છે સોસિયલ મિડિયાનો પાવર. વાત વાયરલ થતાં વાર નથી લાગતી. આ વાયરલ વાતે સમાજમાં એક વૈચારિક ક્રાંતી સર્જી દીધી છે.’ ‘સોશિયલ મીડિયા પર “#મીટૂ” હેશટેગનો ઉપયોગ ખૂબ ઝડપથી ભારતમાં પણ ફેલાઈ ગયો છે. જોબ કરતી મહિલાઓને ડર વગર સતામણીનો રિપોર્ટ કઈ રીતે કરવો તે શીખવવામાં આવી રહ્યું છે.  પુરુષોને પણ ઓફિસોમાં ખાસ ટ્રેનિંગ આપવામાં આવે છે કે સેક્સ્ચ્યુઅલ હેરેસ્ટમેન્ટમાં કઈ નાની નાની વાતોનો પણ સમાવેશ થાય છે. સાહેબો હવે તમે છટકી નહિ શકો. ખરેખર તો આ માત્ર ભારતની જ વાત નથી. પુરુષો દ્વારા કો વર્કર્સની થતી સતામણી વૈશ્વિક છે. અમેરિકામાં પણ છે. યુરોપમાં પણ છે. અને આફ્રિકામાં પણ છે. જ્યાં જૂઓ ત્યાં બધે જ છે.’  ‘પહેલાં મૌખિક સતામણી થાય, કોમેન્ટ થાય અને પછી શારીરિક અડપલાં અને છેડછાડ શરૂ થાય. બદનામી, શરમ, ધાક ધમકી, નોકરી જવાનો ભય, અંગત લાચારી નો ભોગ બનેલી બાળકી, સગીર છોકરી કે પુખ્ત મહિલા બળાત્કારનો ભોગ બને, મૂંગી રહે, આખી જીંદગી પિડાય અને કેટલીક આત્મહત્યા પણ કરે. લોકોને તો મહિલાનો દોષ જ દેખાય. તેં આવા કપડાં પહેર્યાં. તું આવી રીતે જ વર્તી એટલે જ તારી સાથે આવું થયું; વિગેરે વિગેરે. સ્ત્રી ક્યાં જાય? કોને ફરિયાદ કરે?’ ‘પણ આ મી ટૂ ની ચેતનાથી હવે જે જે સ્ત્રીઓએ ભોગવ્યું છે તેઓ ધીમે ધીમે હિમ્મતથી બહાર આવી રહી છે. વર્ષો પહેલાં થયેલા અન્યાય જાહેર કરવા માંડ્યા છે.’  ‘અમેરિકાનો તાજો જ કિસ્સો છે. સુપ્રીમ કોર્ટના નોમિનેશન વેળા ડો.ફોર્ડ જેવી મહિલા તેના ટીન વર્ષોમાં થયેલા બનાવની વાત લાવ્યા હતા. આજે પ્રસિદ્ધ ટીવી અને ફિલ્મ અભિનેતા બિલ કોસ્બી જેલમાં છે. બિલ ક્લિન્ટન અને ડોનાલ્ટ ટ્રંપનીની વાતો ચર્ચાય છે.’ ‘સ્ત્રી પુરુષો સાથે કામ કરતા હોય એવું એક પણ ક્ષેત્ર આમાંથી મુક્ત નથી. અમેરિકા હોય કે ઈન્ડિયા, હજુ આપણો સમાજ પુરુષ પ્રધાન છે. ફિલ્મ ઈન્ડસ્ટ્રી, શિક્ષણ સંસ્થા, રાજકારણ, મંદિરો અને ચર્ચો, બધે જ જાતીય સતામણી નું અસ્તિત્વ છે જ.’ ઘણાંએ “મી ટૂ” સાંભળ્યું હતું પણ આનો ઇતિહાસ કે મૂળ ખબર ન હતું. આમ જૂઓ તો આ ગંભીર અને શૈક્ષણિક વાત હતી. ત્યાર પછી તો અમારા મિત્ર મંગુમોટેલે ભારતના નામી નેતા અભિનેતા, કાસ્ટિંગ કોચની ઘણી વાતો કરી. ૨૪,ઓક્ટોબર ૨૦૧૭માં ઈજી પેનુ અને રોય નામના કેલિફોર્નિયાના ઈન્ડિયન સ્ટુડ્ન્ટે ઈન્ડિયાના એક સો જેટલા મોટા માથાના જાણીતા માણસોના નામની યાદી સોસિયલ મિડિયા પર ફરતી કરી હતી. આ લોકોના સેક્સ્ચ્યુઅલ પ્રરાક્રમો ળતાઅને ત્રાસની માહિતી હતી. કમનસીબે બધા કેસ દબાઈ ગયા અને સફળતા ન મળી. પણ ફાયદો એ થયો કે શિક્ષણ ક્ષેત્રે યુનિવર્સિટિઓમાં એક ફફડાટ વ્યાપી ગયો હતો. નાના પાટેકર કે એમ.જે. અકબર અને અનુ મલિક તો ટીપ ઓફ ધ આઈસબર્ગ કહેવાય. આવા તો કંઇકેટલા કેસ બહાર આવશે.  વિદુષીનીએ કહ્યું ‘મેં  હમણાં જ ઈન્ડિયન ન્યુઝ પેપરમાં વાંચ્યું. સરસ લખ્યું હતું.’

“યત્ર નાર્યસ્તુ પૂજ્યન્તે રમન્તે તત્ર દેવતા:” જ્યાં નારીનું સન્માન થાય છે ત્યાં દેવતાઓનો વાસ હોય છે. માની લઇએ કે જ્યાં મહિલાઓનું સન્માન થાય ત્યાં દેવતાઓ વસે છે પણ કમનસીબી એ છે કે દેવતાઓને વસવાનું મન થાય એવી જગ્યા હવે બહુ ઓછી બચી છે. હૅશટેગ “મી ટુ” કેમ્પેઇને આખી દુનિયામાં મહિલાઓ પર થતા અત્યાચારોની વાતો ઉઘાડી પાડી છે. મારી સાથે પણ આવું થયું છે એવું કહેનારી મહિલાઓની સંખ્યા વધતી જ જાય છે.

બોલિવૂડની સરોજ ખાને કહ્યું કે, ફિલ્મ ઇન્ડસ્ટ્રીમાં કાસ્ટિંગ કાઉચ છે પણ અહીં રેપ કરીને મહિલાને રઝળતી મૂકી દેવાતી નથી અને રોજી-રોટી અપાય છે!

લો કરો વાત! આ વાતે મોટો ઊહાપોહ મચ્યો પછી સરોજ ખાને માફી પણ માંગી. ફિલ્મ ઇન્ડસ્ટ્રી આ મામલે ખરડાયેલી છે. હજુ હમણાં સાઉથની હિરોઇન શ્રી રેડ્ડીએ, હૈદ્રાબાદના પોશ વિસ્તાર જ્યુબિલી હિલ્સમાં આવેલી ફિલ્મ ચેમ્બરની ઓફિસની સામે ટોપલેસ થઇને કાસ્ટિંગ કાઉચની વાત કરી હતી. તેણે તો ફિલ્મ ઇન્ડસ્ટ્રીના મોટાં માથાઓનાં નામ પણ આપ્યાં હતાં. અગાઉ પણ આવું કહેવાની હિંમત ઘણી હિરોઇનોએ કરી છે પણ થોડોક ઊહાપોહ થયા પછી બધું રાબેતા મુજબ ચાલવા લાગે છે. બોલિવૂડમાં તો હવે એવી હાલત છે કે કાસ્ટિંગ કાઉચ માત્ર હિરોઇનોનું જ નહીં, પુરુષ કલાકારો સાથે પણ આવું થાય છે.

કોંગ્રેસના નેતા રેણુકા ચૌધરીએ કબુલ્યું કહ્યું હતું કે રાજકારણ પણ આમાંથી બાકાત નથી. તેમણે કહ્યું કે કોઇએ તો હવે બહાર આવવું પડશે. આપણે ત્યાં નેતાઓ થોડુંક બોલીને ચૂપ થઇ જાય છે. વર્કિંગ વુમન્સ માટે આપણે ત્યાં કડક કાયદાઓ છે, પણ જ્યાં સુધી મહિલાઓ તેના ઉપર જે વીતે છે એ હિંમતભેર કહેવા માટે આગળ નહીં આવે ત્યાં સુધી એ કાયદાનો કોઇ ફાયદો થવાનો નથી. સમાજે પણ આવું બહાર લાવનાર મહિલાને બિરદાવવાનું કામ કરવું જોઇએ. મહિલાઓ મોટાભાગે એ કારણે ડરતી રહે છે કે એનું નામ બદનામ થશે. સમાજ જ્યારે એની પડખે ઊભો રહેશે ત્યારે જ જે ખરાબીઓ છે એ બહાર આવશે.

વિદુષીની અને મંગુ જ સમાચારોની વાત કરતાં હતાં.  અમે બધા શ્રોતા હતાં. મંગુ ઈન્ડિયન સોસિયલ મિડિયા પર કાયમ ભટકતો માણસ એટલે ઘણી વાતોથી માહિતગાર. એણે કહ્યું કે ૧૪ વરસની ઋચિકા હરિયાણાના પોલીસવડા રાઠોડની સામે પડેલી, એને ક્યાં આગળ આવવું હતું કે કેરિયર બનાવવું હતું ? બિચારીને આપઘાત કરવો પડેલો.

એરહોસ્ટેસ ગીતીકા હરિયાણાના મિનીસ્ટર સામે પડેલી એને ય આપઘાત કરવો પડેલો ૬ મહિના પછી એની માને પણ મરવું પડેલું. જેસીકા લાલને તો તરત જ કપાળ વચ્ચે બુલેટ મળેલી. મોટા માથાની સામે પડો એટલે પોલીસ અને વકીલોની ફોજ તમારી પાછળ પડી જાય કે તમારે મરે છૂટકો. સામાજીક, આર્થિક રીતે તમે પાયમાલ થઈ જાઓ.

ચંપાની વચલી વહુ, વિદુષીની જેવી શાંત અને ઠરેલ નહીં, જો વિફરે તો દુર્ગામાતાનો અવતાર. એણે  વાતમાં ઝંપલાવ્યું. ‘આપણે તો ફરિયાદ બરિયાદમાં માનીયે જ નહિ. વાંકીચૂકી વાતનો ઈશારો મળે એટલે તરત જ ઝપેટી નાંખવાનો. એકવાર ઈન્ડિયામાં મારી મમ્મી સાથે મંદિરે ગઈ’તી. એવી ખાસ ગીરદી પણ ન હતી. તોયે એક ભક્ત મારી પાછળ અને પાછળ જ રહે અને મારા બટ્ટ સાથે ઘસાયા કરે. જરાવાર જોયા કર્યું. પછી એના પેટમાં મારી એવી તો કોંણી મારી કે વળ ખાઈ ગયો. પછી મેં કહ્યું સોરી કાકા, આ ગીરદીમાં તો એવું થવાનું જ.’

‘એક વાર બસમાં મને એવું થયું હતું. બસ લગભગ ખાલી હતી. મારી બાજુની સીટ ખાલી હતી. બસમાં પુરતી જગ્યા હોવા છતાં, એક કાકો મારી બાજુમાં આવીને બેઠો. પછી મારી પાસેને પાસે ખસતો જાય. મેં તો મોટેથી બુમ જ પાડી, કંડક્ટર બસને પોલીસ સ્ટેશન પર લઈ જા. આ નાલાયક છેડતી કરે છે. માનશો નહિ પણ એ ઉઠીને ચાલુ બસે ઉતરીને નાસી ગયો.’

‘બે ત્ર્ણ લફંગાઓને કોલેજ ગરબામાં પણ બેનપણીઓ સાથે ઝપેટ્યા હતા. રાહ જોવાની જ નહિ.’ જાણે બાંય ચઢાવતી હોય એમ બધી બંગડી ઉપર ચઢાવી.

ચંપાએ ડોમેસ્ટિક એબ્યુઝની વાત કરી. બાળકીઓ ઉપર સ્વજન વડીલો કે ઓળખીતા કાકા મામાઓ બળાત્કાર કરે અને નાની છોકરીઓ બીચારી ચૂપ રહે. ટીનેજર પર બળાત્કાર થાય; ઈજ્જત સાચવવા આત્મહત્યા કે એબોર્શનનો માર્ગ લેવો પડે. વિક્ટિમ તો શું પણ માબાપ જાણતા હોય તો પણ એઓ બિચારા ચૂપ રહે. મિત્ર સાથે ડેટિંગમાં જતી છોકરીઓને પણ ફસાવીને સીધી પથારી ભેગી કરી દે.

ભલેને ગમે તેવો સગો હોય તો પણ વાત સાચી હોય તો ફટકારી ફટકારીને એને ફજેત કરી મુકવો જોઈએ. કે બીજાને પાઠ શીખવાના મળે.

વચલી વહુ કહે, ‘મરદોએ એ સમજી લેવું જોઈએ કે “નો મીન્સ નો” ભલેને એ હસબન્ડ વાઈફ વચ્ચેની વાત હોય. એ રેઇપ કહેવાય. ઈચ્છા અને મંજુરી વગરનો સેક્સ બળાત્કાર જ કહેવાય. વચલી ચંપાની બાજુમાં જ બેઠી હતી. ધીમે રહીને ચંપાને કહ્યું, ‘મમ્મી, તમારા દીકરા પર કેસ ઠોકી દઉં. કાલે મેં એને એકવાર ના કહી હતી.’ ચંપા એની બધી વહુઓ સાથે સાસુ તરીકે નહિ પણ પ્રેમથી ફ્રેન્ડ તરીકે જ વર્તન રાખતી. એટલે જ આવી ફ્રેન્ડલી વાતો પણ થતી. અમે અને આખું સુરત જાણે કે અમારા ચંદુ અને ચંપાના લવ-લફારાં પછી એક જ ન્યાતના એટલે માબાપે વિવાહ સગપણ કરી આપેલું. અમારા ચંદુચંપા એને લાઈસ્ન્સ સમજી બેઠેલા. પરિણામે ચંદુભાઈને સરાધીયામાં ઘોડે ચડવું પડેલું.

ચંપાએ જરા ચંદુ સાંભળે એમ વચલીને કહ્યું. ‘લગ્ન પહેલાં મે બેવાર ના કહી હતી તોયે તારા શ્વસુરજીએ મને ભોળવી. હવે એક કે બે વાર ના કેહેવાથી આજના હબી અટકતા નથી. ત્રણ વાર ના કહેવી પડે. પહેલી ના ને તો એઓ હા જ સમજે છે, બીજી નાને “મે બી” ગણી કાઢે.

અમારા સૌની નજર ચંદુ પર સ્થિર થઈ.

બિચારો ચંદુ પંચોતેર પ્લસની ઉમ્મરે પણ એકવીશનો હોય એમ શરમાયો. એણે કબુલ કર્યું ‘થઈ ગયું એ થઈ ગયુ. આપણે સૌ સુખી છીએ. આ બધી વાત છોડો. જરા કેઈક અને કોફી વાળું થવા દો. કરસનદાદાદાને માટે કેરેટ કૅક લાવો.’ વાત આગળ ના વધારવા ચંદુએ ઓર્ડર ફરમાવ્યો. વાતાવરણ જરા હળવું થયું.

મંગુની નજર અમારા કરસનદાદા પર પડી. દાદા ચોધાર આંસુએ રડતા હતા.

‘દાદા, શું થયું. દાદા આર યુ ઓલ રાઈટ? દાદા ૯૧૧ને ફોન કરું?’ ભલેને મંગુના જન્માક્ષર કરસનદાદા સાથે મળતાનહોતા આવતા હોય પણ કરસનદાદા માટે દોડવું પડે તો એ જ દોડી વળતો.

‘દાદા શું થયું.’

ધીમેથી દાદાએ કહ્યું “મી ટુ”

હેંએએએ? વ્હોટ? દાદા તમને કોઈએ…..?

‘ના મેં કોઈને…આ પસ્તાવો થાય છે.’

‘દાદા શું થયું હતું? માંડીને વાત કરો.’ દાદાએ આંખો નૂંછી, પાણી પીધું. વાત શરૂ કરી.

‘મારા બીજા લગ્ન પછીની વાત છે. મારી સેકંડ વાઈફના કાકાની દીકરી રમા અમારે ત્યાં ત્રણ ચાર દિવસ મહેમાન તરીકે આવેલી. ખરેખર તો મારી જ ઉમ્મરની. વાઈફની પિત્રાઈ મોટી બહેન થાય. પરણેલી પણ હતી. પણ મને બહુ જ ગમતી હતી. એકાંતમાં અચાનક મારાથી એને ગાલ પર બકી થઈ ગઈ. અરે આ શું કરો છો? તમારાથી આવું થાય? હું તો તમારી મોટી બહેન કહેવાઉં. આ પછી રમા એક દિવસ વહેલી ચાલી ગઈ. ત્યાર પછી રમાએ કોઈ પણ દિવસ મારી સામે જોયું નથી કે  વાત કરી નથી. હવે તો રમા આ દુનિયામાં નથી. એના કોઈ છૈયા છોકરાં પણ નથી. મને આજે ખોટું કર્યાનો ખુબ જ પસ્તાવો થાય છે. આજે જો રમા જીવતી હોત એ પણ કહેતે “મી ટૂ”.

કરસનદાદા ફરી ચોધાર આંસુએ રડ્યા. ડૂસકાં સાથે એમણે અનેકવાર રમાની માફી માંગી. વહુઓ કેઇક કોફિની તૈયારીમાં પડી.

ચંપા દાદાને આશ્વાસન આપતી હતી. ‘દાદા હવે રમા નથી. હોત તો તમને રડાવતે; હવે રડવાનો કાંઈ અર્થ નથી. તે સમયે રમાએ બુમાબુમ કરી હોત તો ફજેતો થાત. તમે બચી ગયા. કલાપીએ કહ્યું છે તે પ્રમાણે કબુલાત કરી, માફી માંગીને પસ્તાવો જાહેર કર્યો એટલું પુરતું છે. હવે આ કેરેટ કેકનો નાનો પીસ બચ્યો છે તે લઈ લો. મંગુભાઈ કહેતા હતા કે હવે દાદાનો કેઇક ખાવાનો મૂડ નહિ હોય એમ કહીને મોટ્ટો પીસ એમણે લઈ લીધો છે.’

‘સાલો બદમાશ મંગો, મારો સાત જનમનો દુશ્મન છે.’ કરસનદાદાએ શક્ય એટલી ભદ્રભાષામાં મંગુને ઢગલાબંધ સુરતી સંભળાવી. મંગુ અમને કહેતો હતો કે ‘ડોસો પશ્ચાતાપનું નહિ પણ, પરાક્રમ કરવાનું રહી ગયાનું રડતો હશે.’

“તિરંગા” નવેમ્બર ૨૦૧૮.

 

 

 

7 responses to “ચંદુ ચાવાલા અને કરસનદાદાનું “Me Too”

  1. pravinshastri November 12, 2018 at 11:46 PM

    આભાર ગાંધી સાહેબ.

    Like

  2. મનસુખલાલ ગાંધી November 12, 2018 at 9:09 PM

    બહુ સુંદર સમજાવ્યું છે.

    Liked by 1 person

  3. pravinshastri November 5, 2018 at 7:44 PM

    આભાર અમૃતભાઈ.

    Like

  4. pragnaju November 5, 2018 at 4:15 PM

    મી ટૂ અંગે વધારે જાણ્યું…હવે તો આ કમાવવાનો ધંધો થતો જાય છે પુરતા નાણા મળતા સમાધાન થઇ જાય છે
    અને
    અણધાર્યો અંત – ‘ડોસો પશ્ચાતાપનું નહિ પણ, પરાક્રમ કરવાનું રહી ગયાનું રડતો હશે.’
    સાહીત્યકાર મા જુ’ભાઇએ -‘ખરા વાર્તાકાર પ્રગટ થયા ‘ તે મોટી વાત છે ખૂબ ખૂબ અભિનંદન

    Liked by 1 person

  5. Amrut Hazari. November 5, 2018 at 2:14 PM

    આજના ‘ હોટ ટોપીકને‘ તમે સરસ વાચા આપી…રમુજીની સાથે.
    અેક બીજાની સંમતીથી બે સાથીઓ અેકતા સાઘે તો પછી ‘ મી ટૂ‘ નો પ્રશ્ન નથી રહેતો. પણ પૈસા પડાવવા માટે કોઇ ગેરલાભ પણ ઉઠાવે.
    પરંતુ આ પ્રશ્ન યુનિવર્શલ છે. સાંપ્રત છે.
    અભિનંદન.
    અમૃત હઝારી.

    Liked by 1 person

  6. pravinshastri November 5, 2018 at 7:59 AM

    આભાર જુભાઈ. એક કાલ્પનિક સુરતી સિનીયરસની હળવી વાતોની આ સીરીઝ છે. અમેરિકા ભારતની સાંપ્રત વાતો ન્યુ જર્સીના માસિક “તિરંગા” માટે લખું છું.

    Like

  7. jugalkishor November 5, 2018 at 7:31 AM

    આજે નીરાંતે વાંચ્યું. વધુ સમય લઈને લખીશ.

    છેલ્લા વાક્યમાં ખરા વાર્તાકાર પ્રગટ થયા તે બતાવવા માટે જ આ ટીપ્પણી ! અભીનંદન.

    Liked by 1 person

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: